Angliýanyň “Liwerpul” klubunyň öňki baş tälimçisi Ýurgen Klopp Red Bull kompaniýasynda futbol amallarynyň ýolbaşçysy boldy.
Ol täze wezipede 2025-nji ýylyň 1-nji ýanwaryndan işe girişer. Red Bull ulgamyna Germaniýanyň “Leýpsig”, Awstriýanyň “Zalsburg”, “Nýu-Ýork Red Bullz” (MLS) we Braziliýanyň “Red Bull Bragantino” klublary girýär.
“Men bizde bar bolan ajaýyp futbol zehinlerini ösdürmek, kämilleşdirmek we goldamak isleýärin” – diýip, “Red Bull” kompaniýasynyň metbugat gullugy sosial ulgamdaky resmi sahypasynda Kloppuň sözlerini getirýär.
Ýatlap geçsek, Klopp geçen möwsüm tamamlanandan soň, “Liwerpuly” terk etdi. Ol ýakyn wagtda tälimçilik işine gaýdyp barmajakdygyny ençeme gezek aýtdy we hatda ABŞ-nyň milli ýygyndysyna ýolbaşçylyk etmekden ýüz öwürdi.
Klopp tälimçilik karýerasyna “Maýnsda” başlady (2001-2008), soň Dortmundyň “Borussiýasyna” geçdi (2008-2015). Onuň ýolbaşçylygynda Dortmund kluby 1996-njy ýyldan bäri ilkinji gezek yzygider iki gezek ýurduň çempiony boldy we taryhda ikinji gezek Çempionlar ligasynyň finalyna çykdy.
2015-nji ýylda “Liwerpula” tälimçi bolup, ony APL-de, Angliýanyň Kubogynda we Superkubogynda, iki Liga kubogynda, Çempionlar ligasynda, UEFA-nyň Superkubogynda we Klublaýyn dünýä çempionatynda ýeňşe getirdi. Kloppdan öň “Liwerpul” 1990-njy ýyldan bäri ýurduň çempionatyny utmandy.
