Amerikanyň Skydweller Aero kompaniýasy diňe Gün energiýasy bilen işleýän uçarmansyz uçýan Skydweller apparatynyň synaglaryny üstünlikli tamamlady. Inženerler täsirli özbaşdaklygy gazanmagy başardylar.
Synaglar Missisipi ştatynda geçirildi. Synag uçuşlary wagtynda apparat zarýad bermezden 22,5 sagada çenli howada boldy we işläp düzüjileriň sözlerine görä, bu entek aňryçäk däl. Kompaniýa geljekde uçarmansyz uçaryň birnäçe hepdeläp, hatda birnäçe aýlap awtonom uçup biljekdigini öňe sürdi.
Skydweller uglerod süýüminden ýasalýar, ganatlarynyň uzynlygy 72 metr bolup, Boeing 747 uçarynyň ululygy bilen deňeşdirilýär. Apparatyň agramy 2,5 tonna bolup, 133 müň metre çenli beýiklige 363 kg ýüki göterip äkitmäge ukyply.
Uçarmansyz uçar Gün energiýasy bilen işleýär we ýangyç ýa-da daşyndan elektrik energiýasyny talap etmeýär. Mundan başga-da, apparat sessiz we uglerod zyňyndysyz işleýär.
Şeýle uçarmansyz uçaryň köp ugurlarda peýdaly boljakdygy bellendi. Hususan-da, ony deňiz garakçylaryna we neşe söwdasyny edýänlere gözegçilik etmek, şeýle hem ýabany haýwanlaryň göçmegine we Afrikada brakonýerlige garşy göreşmek üçin ulanmak meýilleşdirilýär.
