Bitkoin kriptowalýutasyny döreden Satoşi Nakamotonyň şahsyýeti häli-häzire çenli syrly bolmagynda galýar. Bu lakamyň aňyrsynda bir topar adamyň gizlenip biljekdigi barada aýdylýar. Her niçigem bolsa, onuň şahsyýeti bilen baglanyşykly indi 15 ýyl bäri dürli çaklamalar öňe sürülýär.
Şu gürrüňleriň çäginde HBO studiýasy bitkoiniň döredijisi barada film çykardy. Satoşiniň şahsyýetini açmagy wada berýän dokumental film "Money Electric: The Bitcoin Mystery" diýlip atlandyrylýar we 8-nji oktýabrda ekranlara çykar.
Filmiň awtory Kallen Hobakyň sözlerine görä, bu film diňe bir Nakamotonyň şahsyýetini açyp görkezmek bilen çäklenmän, dünýä maliýe bazarlarynda sarsgyn döredip, ABŞ-nyň prezident saýlawlary ýaly syýasy wakalara täsir edip biler.
Satoşi Nakamoto bitkoini 2009-njy ýylda döretdi. Onuň gapjyklarynda 1,1 million töweregi bitkoin bar diýlip çaklanylýar, ýöne olar kriptowalýutanyň döredilen gününden bäri ulanylmaýar. Nakamotonyň häzirki baýlygy 66 milliard dollar diýlip çaklanylýar we ony dünýäniň iň baý adamlaryndan birine öwürýär.
