Sabrina Men alty aý möhlet bilen Huawei-niň çalşyrylýan başlygy we baş müdiri wezipesini eýeledi. Ol 2024-nji ýylyň 1-nji oktýabryndan 2025-nji ýylyň 31-nji martyna çenli kompaniýa ýolbaşçylyk eder diýip, Hytaýyň tehnologiýa ägirdi habar berdi.
Men kompaniýanyň müdirler geňeşine we ýerine ýetiriji komitetine ýolbaşçylyk edip, şol bir wagtyň özünde maliýe müdiriniň borçlaryny ýerine ýetirmegini dowam eder. Täze wezipede ol 30-njy sentýabrda ygtyýarlylyk möhleti tamamlanan Erik Sýuýyň ornuny eýeledi.
Sabrina Men Huawei-niň esaslandyryjysy Žen Çženfeýiň gyzydyr. Ol kompaniýada 1993-nji ýyldan bäri işleýär we öň halkara buhgalteriýa bölüminiň müdiri we buhgalter hasabyny dolandyryş bölüminiň prezidenti wezipelerini eýeledi. Ol 2023-nji ýylyň aprel aýynda çalşyrylýan başlyk wezipesini ilkinji gezek eýeläpdi. Şonuň üçin bu onuň bu wezipede ikinji möhletidir.
Huawei ýolbaşçylary çalşyrmaga esaslanýan özboluşly dolandyryş ulgamyny ulanýar. 2004-nji ýyldan kompaniýa baş operasion müdiri çalşyrmak ulgamyny işe girizdi, 2018-nji ýylda bolsa ol başlygy çalşyrmak ulgamyna öwrüldi. Häzirki wagtda kompaniýada üç çalşyrylýan başlyk bar: Sabrina Men, Erik Sýuý we Ken Hu. Olaryň her biri wezipäni alty aý möhlet bilen eýeleýär, bu hem kompaniýa strategiýalara dürli tarapdan seretmäge mümkinçilik berýär.
