Aşgabadyň futbol kluby “Altyn Asyr” AFK-2 Çempionlar ligasynyň toparlaýyn tapgyrynyň Bahreýniň “Al-Haldiýa” toparyna garşy ikinji tapgyr oýnunda ýeňlişe sezewar boldy. Oýun 2-nji oktýabrda “Aşgabat” stadionynda geçirilip, 0:1 hasabynda tamamlandy.
Ýeke-täk goly oýnuň birinji ýarymyna goşulan 4-nji minutda “Al-Haldiýanyň” hüjümçisi Usama Bellatreçe geçirdi.
Oýnuň ikinji ýarymynda türkmen toparynyň gol salmak üçin işjeň synanyşygyna garamazdan, hasaby deňlemek başartmady.
Oýundan soňky metbugat maslahatynda “Altyn Asyryň” baş tälimçisi Ýazguly Hojageldiýew netijeden lapykeç bolandygyny aýdyp, toparyň, iň bolmanda, bir utuga mynasypdygyny belledi.
“Altyn Asyr” üçin bu ýaryşdaky ikinji ýeňliş boldy. Birinji oýunda topar myhmançylykda Yragyň “Eýr Forsundan” 1:2 hasabynda utuldy. 6-njy noýabrda geçiriljek indiki tapgyrda Ýazguly Hojageldiýewiň topary myhmançylykda “Al-Taawun” saud toparyna garşy oýnar.
