Honda täze SE bezeg derejesinde elýeterli bolan täzelenen Accord 2025-i resmi taýdan hödürledi. Bu wersiýa esasy LX modelinden biraz ýokarda durýar we birnäçe möhüm täzelenmeleri aldy diýip, IXBT belleýär.
SE turbo görnüşli 1,5 litrlik dört silindrli hereketlendiriji bilen işleýär we gapy tutawaçlary, aýnalary we merkezi sütünleri ýaly bölekleri özboluşly gara bezegi bilen tapawutlanýar. Daşky görnüşiniň 17 dýuýmlyk gara tekerler bilen üsti ýetirilýär, salonynda gyzdyrylýan öňdäki oturgyçlar, sürüjiniň 10 tarapa süýşüp bilýän oturgyjynyň elektropriwody we lýuk peýda boldy. Modeliň ähli wersiýalarynyň bahasy öňki ýyl bilen deňeşdirilende 400 – 760 dollar gymmatlady.
LX-iň esasy bezeg derejesiniň bahasy 29 390 dollardan başlaýar we turbo görnüşli hereketlendirijini, 17 dýumlyk tekerleri we Honda Sensing sürüjä kömek ulgamyny öz içine alýar.
EX-iň ornuny tutýan SE modeliniň bahasy 31 655 dollar.
Iň arzan gibrid Accord Sport 34 750 dollardan başlaýar.
Gibrid görnüşleri atmosferaly 2,0 litrlik dört silindrli hereketlendiriji we 204 at güýjüni öndürýän we ýokary tygşytlylygy üpjün edýän Honda -yň iki motorly ulgamy bilen üpjün edilen. Şeýle hem, Accord Hybrid 12,3 dýuýmlyk maglumat-güýmenje ekrany, deri oturgyçlar, telefona simsiz zarýad beriji we gurlan Google hyzmatlaryny aldy.
Honda kompaniýasynda Accord-yň satuwynyň 50% -den gowragynyň gibrid görnüşlerinden ybaratdygyny bellediler.
