Missisipi ştatynda awçylar uzynlygy 4,27 m, agramy 363,78 kg bolan ullakan alligatory tutdular. Äpet süýrenijini Missisipi we Luiziana ştatlaryndan akyp geçýän Ýazu derýasynda alty awçy bolup tutdular diýip, Daily Mail ýazýar.
Awçylar topary gaýykdan 230 metr uzaklykda alligatoryň peýda bolanyny görüpdir. Esli wagt garaşanlaryndan soň, onuň ýanyna golaý baryp, haýwany ýokary çekip çykarypdyrlar. Aw aňsat bolmandyr, topar güýçli ýagýan ýagşyň astynda galypdyr we enjamlary hem näsazlyk tapypdyr. Äpet haýwan bilen darkaş azyndan bir sagat töweregi dowam edipdir.
Alligator boýun egdirilenden soň, oljalary bilen surata düşüpdirler, soňra haýwany eti gaýtadan işleýän zawoda iberipdirler.
Awçylar etiň aglabasyny özleri üçin alyp, galanlaryny mätäç maşgalalara et paýlaýan Hunter Harvest haýyr-sahawat guramasyna bagyşladylar.
Missisipi ştatynda alligator awlamaklyga kanuny taýdan rugsat berlen, ýöne bu Ýabany tebigat, balykçylyk we seýilgähler departamenti tarapyndan düzgünleşdirilýär. Her awçy iki haýwandan köp awlamaly däldir. Awçylar süýrenijileri tutmakda dürli usullary we gurallary ulanýarlar, onsoňam olja diňe bir et bolman, eýsem, guşak we gapjyk öndürmekde ulanylýan alligator derisi hem bolup biler.
Şeýle awyň etikasy barada sosial ulgamlarda jedeller möwjedi. Käbir ulanyjylar şeýle ajaýyp haýwanyň öldürilenine gynanç bildirdiler we alligatoryň azyndan 50 ýaşynda bolmagynyň mümkindigini çakladylar.
