Amerikaly aýdymçy Selena Gomes dollar milliarderi boldy. Bu barada Bloomberg habar berýär.
Agentligiň hasaplamalaryna görä, Gomesiň baýlygy, esasan, işewürligiň hasabyna 1,3 mlrd dollara ýetdi. Aýdymçynyň bäş ýyl mundan ozal işe girizen Rare Beauty atly kosmetika hatary bar. Brendiň kapitalynyň 80%-i Gomesiň paýyna düşýär.
Bloomberg Gomesiň maliýe ýagdaýyny hasaplamak üçin onuň satylan aýdym-saz albomlarynyň we gozgalmaýan emläkleriniň bahasyny, akym hyzmatlary bilen şertnamalardan, brendler bilen hyzmatdaşlykdan, konsertler üçin petek satuwyndan we aktýorlyk işinden gelýän girdejileri göz öňünde tutdy. Şeýle-de, Gomesiň akyl taýdan näsazlygy bolan adamlara kömek edýän we akyl saglygyny öwrenmek bilen meşgullanýan Wondermind startapy bar.
Şeýlelikde, aýdymçynyň kapitalynyň 6,9%-ini hyzmatdaşlyk şertnamalary, 4,8%-ini konsert girdejileri, 2,6%-ini Wondermind, 1,8%-ini albom satuwy, 1,3%-ini aktýorlyk işi emele getirýär. Akym hyzmatlary bilen şertnamalar we onuň gozgalmaýan emläginiň umumy bahasy kapitalyň 0,7%-ini we 0,6%-ini üpjün edýär.
Gomes karýerasyna 2002-nji ýylda başlap, “Barni we dostlar” şouwyna düşdi, ýöne ol “Weýberli pleýs” serialynyň üsti bilen meşhurlyk gazandy. Ol aýdym-saz karýerasyna başlandan soň, Selena Gomez & the Scene toparynyň düzüminde ilkinji üç studiýa albomyny çykardy, soň onuň ýene iki mini-albomy we bir ýygyndysy çykdy. Soňra Gomes ýekelikde çykyş edip başlady we diňe aýdym çykardy.
