Portugaliýanyň milli futbol ýygyndysynyň hüjümçisi Kriştianu Ronaldu Milletler ligasynyň toparlaýyn tapgyrynyň Horwatiýa garşy oýnunda gol bilen tapawutlandy.
Bu gol hem Ronaldu üçin karýerasynda 900-nji boldy, ol taryhda ilkinji bolup bu görkezijä ýetdi. Hüjümçi ispan “Realynyň” (450 gol) we Portugaliýanyň milli ýygyndysynyň (131) taryhynda iň gowy bombardir hasaplanylýar, şeýle-de ol Angliýanyň “Mançester Ýunaýtediniň” düzüminde 145 gol, Italiýanyň “Ýuwentusy” üçin 101, Saud Arabystanyndan “Al-Nasr” üçin 68, Portugaliýanyň “Sportingi” üçin bolsa 5 gol geçirdi.
Halkara Futbol Federasiýasynyň (FIFA) maglumatlaryna görä, Ronaldu 2022-nji ýylyň mart aýynda, resmi oýunlarda geçiren gollarynyň sany boýunça awstriýaly we çehoslowakiýaly hüjümçi Ýozef Bisandan öňe geçende iň gowy bombardir boldy. FIFA-nyň belleýşi ýaly, Bisan “takmynan, 805 goluň” awtorydyr, salnan gollaryň takyk sany näbelli bolup galýar.
Häzirki wagtda Ronaldunyň ýakyn bäsdeşi “Inter Maýami” amerikan klubunyň argentinaly hüjümçisi Lionel Messidir (838).
Ronaldu 39 ýaşynda, ol bäş gezek Çempionlar ligasynyň ýeňijisi, Ýewropa çempiony, Milletler ligasynyň ýeňijisi boldy. Ol milli ýygyndylaryň, Ýewropa çempionatynyň, Çempionlar ligasynyň, Klublaýyn dünýä çempionatynyň taryhynda iň gowy bombardirdir. Futbolçy 2023-nji ýyldan bäri “Al-Nasrda” çykyş edýär.
