Abraýly “France Football” žurnaly ýylyň iň gowy futbolçysyna berilýän “Altyn topa” dalaşgärleriň sanawyny yglan etdi. 30 oýunçydan ybarat sanawda 2003-nji ýyldan bäri ilkinji gezek Lionel Messiniň we Kriştianu Ronaldunyň atlary ýok diýip, RBK habar berýär.
“Inter Maýaminiň” argentinaly hüjümçisi Messi “Altyn topy” rekord sekiz gezek aldy (2009, 2010, 2011, 2012, 2015, 2019, 2021, 2023). Ol 2006 – 2021-nji ýyllarda, şeýle-de 2023-nji ýylda dalaşgärleriň hataryna goşuldy.
Saud “Al-Nasrynyň” portugaliýaly hüjümçisi Ronaldu yzygider ikinji gezek dalaşgärleriň sanawynda görkezilmedi. Ol bu baýraga 2004 – 2022-nji ýyllarda dalaş etdi we “Altyn topy” bäş gezek utup (2008, 2013, 2014, 2016 we 2017), bu görkeziji boýunça ikinji orny eýeledi.
“Altyn top” “France Football” neşiri tarapyndan 1956-njy ýyldan bäri berilýär. 68-nji baýrak gowşurylyş dabarasy 28-nji oktýabrda Parižiň “Şatle” teatrynda geçiriler.
Dabarada 2023/24 möwsümi üçin şu baýraklar hem gowşurylar: zenanlaryň arasynda “Altyn top”, Kopa baýragy (21 ýaşa çenli iň gowy oýunçy), Ýaşin baýragy (iň gowy derwezeban), Gerd Mýuller baýragy (geçen möwsümiň iň gowy bombardiri), “Erkekleriň arasynda ýylyň kluby”, “Zenanlaryň arasynda ýylyň kluby”.
Şeýle-de, ýene iki baýrak goşular – “Erkekleriň arasynda ýylyň tälimçisi” we “Zenanlaryň arasynda ýylyň tälimçisi” – bu baýraklar bilen meýdançada gazanylan üstünliklere ýokary goşant goşan tälimçiler sylaglanar.
