23-nji awgust - 1-nji sentýabr aralygynda Wengriýanyň paýtagty Budapeştde kikboksing boýunça ýetginjekleriň arasyndaky Dünýä çempionaty geçirildi. Bu ýaryşda türkmen türgenleri 5 sany medal gazandylar diýip, Türkmenistan Habarlar portaly habar berýär.
Çempionata dünýäniň 70-e golaý döwletinden 3100 türgen gatnaşdy. Ýurdumyzyň adyndan kikboksing federasiýasynyň başlygy Orazmuhammet Kömekowyň ýolbaşçylygynda 17 türgen, iki tälimçi gatnaşdy.
Netijede türgenlerimiz Ymamguly Rejepow, Salamathan Baltaýew, Nepes Bäşimow degişli agram derejelerinde kick light, low kick boýunça tutluşyp, bürünç medela mynasyp boldular.
Serdar Bekenow full contact görnüşi boýunça 51 kg agramda 3 tutluşyk geçirdi. Türgenimiz kümüş medala eýe boldy.Jasurbeg Ahmedow kik laýt görnüşi boýunça 37 kg agramda çykyş etdi. 4 gezek üstünlikli tutluşan türgenimiz altyn medala eýe bolmagy başardy.
Bulardan başga-da ýedi sany türgenimiz çempionatda üstünlikli çykyp edip, ýeňijileriň ilkinji bäşligine girmegi başardylar.
