Italiýanyň milli ýygyndysynyň düzüminde dünýä çempiony derwezeban Janluiji Buffon Ýewropanyň Futbol Assosiasiýalarynyň Birleşiginiň (UEFA) prezidentiniň baýragyna eýe boldy. Bu barada guramanyň saýtynda habar berilýär.
Ol 29-njy awgustda Monakoda geljekki Çempionlar ligasy möwsüminiň bije çekişik dabarasynda sylaglanar.
“Janluiji Buffon 1990-njy ýyllaryň ortalarynda “Parmanyň” ýaş, hyjuwly derwezebany hökmünde ilkinji gezek peýda bolany bäri buýsanýan oýunçym. Onuň derwezede liderliginden başga-da, uzak karýerasy we maksada okgunlylygy bütin dünýäde futbol janköýerlerini ruhlandyrýar. Onuň dürli nesilleriň durmuşynda täsin durnuklylygy köpleri çür depede galmagyň aňsatdygyna ynandyryp biler. Onuň ýokary derejesine ýeten döwründe dünýäniň öňdebaryjy klublarynyň dalaş edendigine garamazdan, Seriýa B-e geçmegi makul hasaplamagy-da köp zady aňladýar. Şeýle-de, Buffon psihiki saglyk we depressiýa barada aç-açan aýdan ilkinji türgenleriň biridir, bu hem professional sportda bu meselä ünsi çekmäge kömek edýär” – diýip, UEFA-nyň prezidenti Aleksander Çeferin aýtdy.
Buffon 46 ýaşynda. Ol Turiniň “Ýuwentusynyň” düzüminde on gezek Italiýanyň çempionatyny utdy, 1999-njy ýylda “Parma” bilen bilelikde UEFA-nyň Kubogynyň eýesi boldy. “Pari Sen-Žermeniň” oýunçysy hökmünde Buffon Fransiýanyň çempionatynda ýeňiş gazandy. Italiýanyň milli ýygyndysy bilen derwezeban dünýä çempionatyny utdy (2006) we Ýewropa çempionatynyň kümüş baýragynyň eýesi boldy (2012).
