UEFA-nyň wekilleri Çempionlar ligasynyň senasyny sähelçe üýtgetdiler.
Meşhur kompozisiýanyň täzelenen wersiýasynda wokal bölegine has üns berildi. Notalar öňküligine galdy, ýöne saz gurallarynyň ýaňlanyşy birneme üýtgedi.
Çempionlar ligasynyň senasynyň dünýä futbolynda iň meşhur kompozisiýalardan biridigini we ýaryşyň oýunlaryndan öň her gezek ýaňlanýandygyny bellemelidiris.
Internet sahypalarynda satyp ýa-da ondan kanuny göçürip alyp bolmaýan asyl nusgadaky saz 1992-nji ýylda iňlis kompozitory Toni Britten tarapyndan ýazgy edildi. Kompozisiýa nemes nusgawy kompozitory Georg Fridrih Gendeliň (1685-1759) “Sadok ruhany” (iňl. Zadok the Priest) täç geýdiriş senasynyň aranžirlenen görnüşidir.
Çempionlar ligasynyň senasy UEFA-nyň üç resmi dilinde - fransuz, nemes we iňlis dillerinde aýdylýar.
2024/2025 oýun möwsüminden başlap Çempionlar ligasynda öňki ýaly 32 däl-de, 36 topar oýnar. Ozal klublar hersi dört topardan ybarat gruppalara bölünýärdi, indi Çempionlar ligasynda Şweýsariýa ulgamy ulanylar, bu ýerde 36 toparyň hemmesi bir ýaryş jetwelinde bolar. 2024/2025 möwsümi üçin UEFA-nyň Çempionlar ligasynyň finaly 2025-nji ýylyň 31-nji maýynda Mýunheniň “Alýans Arena”-synda geçiriler.
