Týerri Anri şahsy sebäplere görä Fransiýanyň ýaşlar ýygyndysynyň baş tälimçisi wezipesini terk etdi. Bu barada Fransiýanyň Futbol federasiýasynyň (FFF) saýtynda habar berilýär.
Hünärmen milli topara 2023-nji ýylda ýolbaşçy boldy, onuň şertnamasy 2025-nji ýylyň iýun aýyna çenli hereket etmelidi. Parižde geçirilen Olimpiýa oýunlarynda onuň ýolbaşçylygyndaky milli topar kümüş medala mynasyp boldy. Finalda fransiýalylar goşmaça wagtda Ispaniýadan utuldylar.
“Men FFF-e we prezident Filipp Diallo bu ajaýyp mümkinçiligi berendigi üçin minnetdarlyk bildirmek isleýärin. Öz ýurdum üçin Olimpiýa oýunlarynda kümüş medalyň gazanylmagy durmuşymda iň beýik baýraklaryň biri bolup galar. Men uly tejribe almaga mümkinçilik beren federasiýa, oýunçylara, işgärlere we janköýerlere diýseň minnetdar” – diýip, Anri aýtdy.
Bellenilişi ýaly, Fransiýanyň Futbol federasiýasynyň prezidenti Filipp Diallo U-21 ýaşlar ýygyndysy üçin täze tälimçiniň gözlegine başlady.
