Pariždäki “Stad de Frans” stadionynda Olimpiýa oýunlarynyň dabaraly ýapylyşy geçirildi.
Dabara Olimpiada-2024-üň iň köp titula eýe bolan türgeni – suwda ýüzüji Leon Marşan bilen kiçiräk wideodan başlady. Ol simwoliki Olimpiýa alawyny Týuilri bagyndan alyp, ony “Stad de Fransa” eltdi.
Soňra baýdak göterijileriň däp bolan ýörişi boldy, oňa 205 ýurtdan 9 müň töweregi türgen gatnaşdy. Türkmenistanyň baýdagyny Oýunlaryň açylyş dabarasynda baýdak göteriji bolan dzýudoçy Serdar Rahymow göterdi.
Şweýsariýaly pianinoçy Alan Roşeniň howada asylan roýaldaky çykyşy dabaranyň bezegi boldy. Dabaranyň aýdym-saz bölegi dijeý Kavinsky, aýdymçy Angele, Air dueti, şeýle-de Vampire Weekend toparyndan amerikaly Ezra Kýonig bilen bilelikde Phoenix fransuz rok-toparynyň çykyşyny öz içine aldy.
Çäräniň iň esasy wakasy Olimpiýa estafetasynyň Los-Anjelese geçirilmegi boldy. Amerikaly aktýor Tom Kruz “Missiýany ýerine ýetirmek mümkin däl” franşizasynyň stilinde stadionyň üçeginden böküp, gimnastikaçy Simona Baýlzdan Olimpiýa baýdagyny alyp, motosikl bilen gitdi. Şondan soň tomaşaçylara wideo görkezildi: Tom Kruz motosiklde ýük uçaryna münýär, paraşýut bilen böküp, Los-Anjelese gonýar, bu ýerde belli Hollywood nyşanynda OO harplaryny Olimpiýa halkasyna laýyk stilde bezeýär.
Los-Anjelesde kenarýaka sahnasynda Red Hot Chili Peppers topary, aýdymçy Billi Aýliş, repçiler Snup Dogg we Doktor Dre çykyş etdi.
Ahyrynda hereket “Stad de Fransa” gaýdyp gelýär, bu ýerde dabara Olimpiýa alawynyň söndürilmegi we dabaraly feýerwerk bilen tamamlanýar.
Belläp geçsek, 28-nji awgustda Paralimpiýa oýunlary başlar. Olar Olimpiadanyň geçen desgalarynda geçiriler.
