Pariždäki Olimpiýa oýunlarynyň iň soňky gününiň öň ýanynda 39 medal toplumy ugrunda bäsleşildi. Resmi däl medal ugrundaky sport göreşi Hytaý bilen ABŞ-nyň arasynda dowam edýär.
Hytaý altyn medalyň sany boýunça öňe çykdy (39). Amerikalylaryň hasabynda 38 altyn medal bar, ýöne olar umumy medal sany boýunça öňde – hytaý türgenleriniň 90 medalyna garşy 122.
TmCars okyjylary Oýunlaryň iň gyzykly wakalary bilen tanyşdyrmagy dowam edýär:
Futbol: ABŞ-nyň zenanlar ýygyndysy Braziliýany 1:0 hasabynda utup, bäşinji Olimpiýa altyn medalyny gazandy.
Basketbol: MBA ýyldyzlaryndan ybarat ABŞ-nyň erkekler ýygyndysy finalda Fransiýanyň toparyny utup, 17-nji Olimpiýa altyn medalyny gazandy.
Ýeňil atletika:
Amerikalylar (hem erkekler, hem zenanlar) 4x400 m estafeta ýaryşynda ýeňiş gazandylar. ABŞ-nyň erkekler ýygyndysy täze Olimpiýa rekordyny goýdy.
Keniýadan Feýt Kipýegon 1500 metre ylgamakda üç gezek Olimpiýa çempiony boldy, ol Olimpiýa rekordyny goýdy.
Beýiklige bökmekde täze zelandiýaly Hemiş Kerr bilen amerikaly Şelbi Makýueniň ikisi-de netijeleriň doly deňligi sebäpli altyn medal alyp bilýärdiler, ýöne türgenler münberde birinji orny paýlaşmaga razy bolmadylar, şonuň üçin ýeňiji gaýtadan bökmekde kesgitlendi. Ýeňşi Kerr gazandy.
Agyr atletika:
Gruziýadan Laşa Talahadze 102 kg-den ýokary agram derejesinde üç gezek Olimpiýa çempiony boldy.
Hytaýly Lýu Huanhua 102 kg çenli agram derejesinde altyn medal gazandy. Türkmenistanly agyr atletikaçy Döwranbek Hasanbaýew çykyşyny onunjy ýerde tamamlady.
Çeper gimnastika: Toparlaýyn köp görnüşli ýaryşda hytaýly gimnastikaçylar sportuň bu görnüşinde öz ýurdy üçin ilkinji Olimpiýa altyn medalyny gazandylar.
Woleýbol: Fransiýanyň erkekler ýygyndysy finalda Polşadan üstün çykyp, yzygider ikinji Olimpiadada ýeňiş gazandy.
Breýking: Phil Wizard hökmünde tanalýan kanadaly Filip Kim Olimpiada üçin bu täze sport görnüşinde erkekleriň arasynda ilkinji Olimpiýa çempiony boldy.
Häzirkizaman bäş görnüşli ýaryş: Müsürden Ahmet Elgendi çempion boldy we dünýä rekordyny goýdy.
HOK: Halkara Olimpiýa Komitetiniň başlygy Tomas Bah 2025-nji ýylda täze möhlete gaýtadan saýlanmazlyk karary barada aýtdy. Pariždäki Olimpiadanyň guramaçylyk komiteti türgenlere zaýalanan medallary çalyşmaga wada berdi.
