Hytaýda ýerleşýän Sindao bioenergetika we biotehnologiýa institutynyň (QIBEBT) inženerleri gaty litiý batareýalary üçin katodyň innowasion modifikasiýasyny döretdiler. Täze tehnologiýa enjamlaryň energiýa dykyzlygyny we hyzmat ediş möhletini 20 000 gezek zarýad berip bolýan derejä çenli ýokarlandyrmaga mümkinçilik berdi diýip, Nature ýazýar.
Litiý-ion batareýalarynyň aşa ýokary temperatura duýgurlygy we ýanmak töwekgelçiligi, şeýle hem ömrüniň gysgalygy ýaly kemçilikler ýaşyl energiýany ösdürmekde we elektrik ulaglaryny giňden ýaýratmakda päsgelçilik döredýär. Alymlar gaty batareýalaryň bu meseleleri çözüp biljekdigine bil baglaýarlar.
Adaty gaty ýagdaýdaky litiý batareýalary geçirijiligi gowulandyrmak üçin hereketsiz materiallaryň goşulmagyny talap edýän geterogen kompozit katodlar sebäpli, kynçylyklara uçrady. Bu goşundylar batareýalaryň energiýa dykyzlygyny we ömrüni peseltdi.
Hytaýly alymlar munuň çözgüdini tapdylar. Ol LTG0.25PSSe0.2 materialyny ulanyp, katody gomogenlemekden ybarat boldy. Täze material ýokary ion we elektron geçirijiligine eýe, bu goşmaça geçiriji komponentleri ulanmazdan, zarýadyň netijeli geçmegini üpjün edýär.
Birmeňzeş katodly batareýanyň prototipi üýtgeşik netijeleri görkezdi: udel sygymy 250 mAh/g, energiýa dykyzlygy 390 Wt·s/kg we otag temperaturasynda zarýad beriş we zarýady gidiş aýlawy - 20 000 gezek.
