Oklahomaly iki sany guwwas - Kim we Natan Meýker Tehasyň kenaryndaky ummanda 40 sagatlap ýüzenlerinden soň, halas edildi. Olaryň başdan geçirenleri barada Inside Edition neşirinde gürrüň berildi.
Bu waka Meksika aýlagynda guwwaslar ýoldaşlary bilen suwa çümende bolup geçýär. Güýçli tolkunly garaşylmadyk tupan bu iki guwwasy kenardan uzaklara äkidýär. Beýleki guwwaslar Kim bilen Natany gözläp, tapmanlaryndan soň alaçsyz gaýyklaryna dolanyp gelýärler we kenarýaka goragçylaryny çagyrmaga mejbur bolýarlar.
"Tolkunlar dynuwsyz yzly-yzyna gelýärdi" - diýip, Kim ýatlaýar. Guwwaslar tolkunlar gelip uranda, gözlerine suw düşmez ýaly, maskalaryny aýyrman saklamaly diýen netijä gelýärler. Natan: "Şunça wagtlap suwuň aşagynda bolsaň, soňabaka doňup, titräp başlaýarsyň, şol sebäpli biz gyzmak üçin gysga aralyga çalasyn hereketler bilen eýläk-beýläk ýüzmegi makul bildik" – diýip, Natan gürrüň berdi.
Olaryň sözlerine görä, suw astynda ýakylýan elçyralary bolmadyk bolsa, belki-de halas bolmak mümkin bolmazdy. Kenarýaka goragçylarynyň biri illýuminatordan "çalt-çalt ýanyp-öçýän yşygy" görýär. "Bulutly howada görüş gaty pesdi, ýöne hernä, yşyk gözüme ildi" – diýip gürrüň berdi.
Kenarýaka goragçylary müňlerçe inedördül kilometr ummany öz içine alýan köpçülikleýin gözleg işini geçirdi. Kim bilen Natan muny gudrat hasaplaýarlar: “Bu ýigitleriň, hakykatdanam, Hudaýyň elidigine ynanýaryn. Muny nädip düşündirjegimi hem bilemok "- diýip, Natan halas edijilere öz minnetdarlygyny bildirýär.
