UEFA resmi saýtynda Çempionlar ligasy 2024/25-iň bije çekişiginiň täze formatda geçiriljekdigini resmi taýdan habar berdi. Ýaryşyň taryhynda ilkinji gezek 36 topar bir ligada oýnar we her topar dürli garşydaşlara garşy 8 oýun geçirer. Şunuň bilen baglylykda, bije çekişik ýörelgesi hem üýtgär: ony ýörite UEFA üçin işlenip düzülen kompýuter programmasy geçirer.
Programma toparlaryň haýsy oýunlary öýde, haýsylaryny myhmançylykda geçirjekdigini kesgitlär. Şeýle ulgam Ýewropa ligasynyň we Konferensiýalar ligasynyň bije çekişikleri üçin hem ulanylar.
Täze formata laýyklykda, Çempionlar ligasynyň 1/8 finalyna 8 sany iň gowy toparyň çykmagy kepillendirilýär. 9 – 24-nji orunlary eýelän toparlar 1/8 finala çykmak üçin goşmaça pleý-off tapgyryny geçirerler.
Häzirki wagtda esasy tapgyra gatnaşjak 29 topar belli, ýene 7 topar kwalifikasiýa arkaly saýlanar. Soňky saýlama pleý-off oýunlary 28-nji awgustda geçiriler.
Liganyň tapgyry üçin bije çekişik 29-njy awgustda Monte-Karlodaky “Grimaldi Forumede” meýilleşdirilýär.
Programma üpjünçiligini işläp düzmek işi 2023-nji ýylyň sentýabr aýyndan bäri UEFA-nyň bije çekişigi geçirmek boýunça hyzmatdaşy bolan AE Live kompaniýasyna tabşyryldy. Programmany işläp taýýarlama we synagdan geçirme prosesi doly totänleýinligi we bije çekişigiň ähli düzgünleriniň berjaý edilmegini üpjün etmek üçin daşarky auditor Ernst & Young tarapyndan gözegçilikde saklandy.
