Ýakynda «Sportda dopinge garşy göreşmek hakynda» Türkmenistanyň Kanunyna üýtgetmeler girizildi. Resminamanyň doly görnüşi "Türkmenistan: Altyn asyr" elektron neşirinde çap edildi.
Resminama laýyklykda, bedenterbiýe we sport guramalary, doping, doping gözegçiligi, Gadagan edilen sanaw, gadagan edilen madda, gadagan edilen usul, testirlemegiň bellige alynýan bileleşigi, KAS, Kodeks, dopinge garşy milli gurama, nusgalyk, sportuň görnüşleri boýunça milli federasiýalar, testirleme, Türkmenistanyň Dopinge garşy göreş barada milli agentligi, türgen, türgeniň personaly, Bütindünýä dopinge garşy agentlik, Halkara standarty, doping gözegçiliginiň ygtyýarly toparlary, ýaryş, ýaryş döwri, ýaryşdan daşary döwür, ÝUNESKO-nyň sportda dopinge garşy göreşmek hakynda Halkara konwensiýasy ýaly Kanunyň maksatlary üçin ulanylýan esasy düşünjeleriň aňladýan manylary getirilýär.
Kanunyň 3-nji maddasynyň 7-nji bendi şu görnüşde beýan edilýär:
«7) terapewtik taýdan peýdalanmaga rugsat berilmeginiň esasynda peýdalanmakdan başga halatlarda türgenler tarapyndan ulanylmagyny çäklendirmek maksady bilen, sportda peýdalanylmagy gadagan edilen maddalaryň we gadagan edilen usullaryň elýeterliliginiň öňüniň alynmagy we onuň çäklendirilmegi boýunça çäreleriň görülmegi. Olaryň hataryna gadagan edilen maddalaryň we gadagan edilen usullaryň türgenleriň arasynda ýaýradylmagyna garşy göreş çäreleri we degişlilikde olaryň öndürilmegine, geçirilmegine, getirilmegine, ýaýradylmagyna we satuwyna gözegçilik etmek boýunça çäreleriň görülmegi girýär;».
Şeýle hem Kanunda Barlagyň netijesi oňyn bolmadyk halatynda türgeniň hukuklary düşündirilýär:
Barlagyň netijesi oňyn bolmadyk halatynda türgeniň ýa-da onuň wekiliniň şulara hukugy bardyr:
1) «B» nusgalygynyň barlagynyň geçirilmegini talap etmäge;
2) gaýragoýmazdan düşündiriş bermäge;
3) eger zerur bolsa, «B» nusgalygynyň gaýtadan barlagynda bolmagyna;
4) «A» nusgalygynyň barlagynyň netijeleri boýunça barlaghanalar üçin Halkara standartynda göz öňünde tutulan maglumatlary saklaýan resminamalaryň göçürmesini almaga;
5) TDGMA-nyň dopinge garşy kadalaryna laýyklykda öz wagtynda, adalatly we tarapgöýsüz diňlenilmäge;
6) Halkara dopinge garşy topara TDGMA-nyň dopinge garşy kadalaryna laýyklykda, birinji basgançakly guramanyň çözgüdine şikaýat etmäge.»;
