Tailandyň Si-Raça şäherinde 20 ýaşa çenli türgenleriň arasyndaky geçirilen Erkin göreş boýunça Aziýanyň çempionatynda türkmenistanly türgen Alp Arslan Begenjow altyn medala mynasyp boldy. Bu barada Turkmenportal habar berýär.
Ýaryş düşekçesine 79 kilograma çenli agram derejesinde çykan türkmen pälwany bu üstünligini dünýäniň dürli döwletlerine wekilçilik edýän 11 sany agramdaşynyň arasynda gazandy.
Altyn medala barýan ýolda Alp Arslan şu garşydaşlaryndan üstün çykdy:
- saýlama tutluşykda - ýaponiýaly Şunsuke Mizusakini 12:2;
- çärýek finalda - gyrgyzystanly Ramazan Iskenderowy 10:0;
- ýarym finalda - gazagystanly Ýerhan Beksultanowy 6:0;
- finalda - eýranly Majid Bageri Heýrabady 10:0 hasabynda ýeňdi.
Şu agram derejäniň bürünç medallaryna hindistanly Amitu Amitu bilen gazagystanly Ýerhan Beksultanow mynasyp boldy.
Bu ýeňiş Alp Arslan Begenjowyň iýul aýynyň dowamynda gazanan ikinji halkara üstünligidir. Ol şu aýda Amman şäherinde geçirilen 23 ýaşa çenli ýaşlaryň arasyndaky Aziýanyň çempionatynda hem bürünç medal eýeläpdi.
Alp Arslan 18 ýaşyny 8-nji awgustda doldurar. Heniz juda ýaşdygyna garamazdan, ol birnäçe halkara ýaryşlaryň ýeňijisidir. 2022-nji we 2023-nji ýyllarda 17 ýaşa çenli ýetginjekleriň arasynda Rumyniýada geçirilen «Constantin Alexandru & Ioan W. Popovici» atly halkara derejeli ýaryşyň altyn medallaryna iki gezek mynasyp bolan ezber erkin göreşçi mundan iki ýyl ozal 65 kilograma çenli agram derejesinde ýetginjekleriň arasynda hem Aziýanyň çempiony bolmagy başarypdy. Geçen ýyl bolsa ol şol ýaryşa 71 kilograma çenli agram derejesinde gatnaşyp, hormat münberiniň üçünji basgançagyna çykdy.
