Argentinaly Diego Maradonanyň 1986-njy ýylyň futbol boýunça dünýä çempionatynyň ýarym final oýnundaky köýnekçesi auksiona çykaryldy. Bu barada Sotheby’s auksionynyň saýtynda habar berilýär.
Şol oýunda Argentinanyň milli ýygyndysy Maradonanyň iki goly bilen belgiýalylary utup (2:0), finala çykdy. Oýundan soň argentinaly hüjümçi bilen Belgiýa toparynyň derwezebany Žan-Mari Praff köýnekçelerini çalyşdylar. Şondan bäri Maradonanyň köýnekçesi derwezebanyň elinde saklandy. Aýgytly oýunda argentinalylar germaniýalylary utup (3:2), ikinji gezek dünýä çempiony boldular.
Maradonanyň köýnekçesi satyljak auksion 2-nji awgustda tamamlanar. Lotuň başlangyç bahasy 700 müň dollar. Auksion öýüniň hasaby boýunça, köýnekçäniň bahasy 800 müň – 1,2 million dollar aralygynda bolar.
Ýatlap geçsek, Maradona 2020-nji ýylyň 25-nji noýabrynda 60 ýaşynda aradan çykdy. Halkara Futbol Federasiýasy (FIFA) resmi saýtynda geçirilen ses berişligiň netijesi boýunça, ony XX asyryň iň gowy futbolçysy diýip ykrar etdi.
