Nýu-Ýorkdaky Sotheby's auksionyna stegozawryň tutuş diýen ýaly skeleti satuwa çykaryldy. Onuň ýaşy 161 million ýyl diýlip çaklanylýar diýip, Associated Press habar berýär.
Apeks diýlip atlandyrylýan stegozawryň beýikligi 3,3 metre, uzynlygy 8,2 metre ýetýär. Ol 2022-nji ýylda Kolorado ştatynyň Dinozawr şäheriniň golaýyndan tapyldy.
Apeks dünýäde iň tanalýan dinozawrlaryň biridir. Onuň häsiýetli ýiti arka plastinalary, alymlaryň pikirine görä, gorag üçin hyzmat edendir diýip çaklanylýar. Galyndylarda söweşden galan alamatlar ýok, ýöne stegozawryň garrylyga çenli ýaşandygyny görkezýän artritiň alamatlary bar.
Skeletiň satuwy çykaryljak auksiony 17-nji iýulda geçer. Sotheby's Apekse 4-6 million dollar nyrh kesýär. Sotheby-niň Ylym we meşhur medeniýet bölüminiň müdiri Kassandra Hatton munuň ýaly derejedäki stegozawryň ozal auksionda satylmandygyny aýtdy.
