Leýboristik partiýanyň lideri Kir Starmer Beýik Britaniýadaky parlament saýlawlarynda ýeňiş gazanandan soň täze Ministrler Kabinetini düzdi. Bu barada BBC habar berýär.
Şeýlelikde, Forin-ofisiň başlygy wezipesine Dewid Lemmi, goranmak ministri wezipesine Jon Hili bellenildi, Reýçel Riwz bolsa Beýik Britaniýanyň ilkinji zenan maliýe ministri boldy.
Beýleki esasy wezipä bellemeleriň hatarynda şular bar:
- Iwett Kuper – içeri işler ministri,
- Şabana Mahmud – adalat ministri,
- Wes Striting – saglygy goraýyş we durmuş taýdan ösüş ministri,
- Brijet Fillipson – bilim ministri,
- Ed Miliband – energetika we uglerod bitaraplygy ministri,
- Liza Nendi – medeniýet ministri,
- Jonatan Reýnolds – telekeçilik we söwda ministri,
- Piter Kaýl – ylym ministri.
Starmeriň kabinetinde premýer-ministriň orunbasary wezipesini 2020-nji ýyldan bäri Leýboristik partiýanyň başlygynyň orunbasary bolan Anjela Reýner eýeledi. Ol deňlik, ýaşaýyş jaý gurluşygy we jemgyýet işleri boýunça döwlet sekretarynyň portfelini aldy.
Pet Makfadden Lankaster gersoglygynyň kansleri wezipesine bellendi. Bu onuň premýer-ministrden soň resmi taýdan kabinetiň iň ýokary derejeli ministridigini aňladýar.
Täze kabinet ykdysady durnuklylygy üpjün etmek, Milli saglygy goraýyş ulgamynda garaşmagyň wagtyny azaltmak, jenaýatçylyk bilen göreşmek we arassa energiýanyň önümçiligi boýunça täze jemgyýetçilik kompaniýasyny döretmek ýaly ileri tutulýan meseleleri çözmäge ünsi jemlär.
Leýboristler terrorçylyk, kontrabanda we adam söwdasy bilen göreşmegiň çäklerinde aýratyn serhet howpsuzlygy gullugyny döretmegi meýilleşdirýärler. Şeýle-de, täze kabinet Angliýanyň mekdeplerinde mugallymlar ştatyny 6,5 müň birlik artdyrmak we başlangyç mekdepleri mugt ertirlik bilen üpjün etmek isleýär.
