Britaniýaly ýaryşa gatnaşyjy Mark Kawendiş “Tur de Frans” tapgyrlarynda gazanan ýeňişleri boýunça 50 ýyl saklanan rekordy täzeledi. Bu barada RBK habar berýär.
Gazagystanyň Astana-Qazaqstan topary üçin çykyş edýän 39 ýaşly türgen welosiped ýaryşynyň bäşinji tapgyrynda ýeňiş gazanyp, “Tur de Fransdaky” ýeňişleriniň sanyny 35-e ýetirdi.
Öňki rekord “Tur de Fransyň” esasy klassifikasiýasynyň bäş gezek ýeňijisi, meşhur belgiýaly Eddi Merkse degişlidi (34 ýeňiş).
Indi Kewandiş birnäçe gün dowam edýän ýaryşyň 35 tapgyrynda ýeňiş gazanan taryhda ýeke-täk welosipedçidir.
“Tur de Frans” dünýäde iň abraýly welosiped ýaryşy hasaplanýar we “Jiro d’Italiýa” we “Wuelta” bilen bilelikde Grand-tur maksatnamasyna girýär. Şu ýyl ol 111-nji gezek geçirilýär, soňky iki ýyl onuň ýeňijisi daniýaly Ýonas Wingegor boldy.
