Her ýyl ýabany haýwanlaryň gülkünç suratlaryny belleýän abraýly Nikon Comedy Wildlife Awards baýragyna arzalaryň kabul ediliş möhletiniň gutarmagyna bir aýdan az wagt galdy. Fotograflary ruhlandyrmak we köpçüligiň şähdini götermek üçin bäsleşigiň guramaçylary eýýäm gelip gowşan iň gowy işleriň birnäçesi bilen paýlaşdylar.
Bu gezek tomaşaçylara şaha-gitarany çalýan leniwes, “üç kelleli” žiraf we “gülmekden ýaňa ýykylyp ýatan” düwlen bilen gülkünç kadrlar garaşýar.
Baýragyň maksady diňe bir adamlary güldürmek däl, eýsem ýabany tebigaty gorap saklamak meselelerine ünsi çekmekdir. Alnan ähli serişdeler haýwanlary goramak bilen meşgullanýan haýyr-sahawat guramalaryna kömek üçin gönükdiriler.
Nikon Comedy Wildlife Awards 2024 üçin arzalaryň kabul edilişi 31-nji iýula çenli dowam edýär. Baýrak ugrunda professional fotograflar bolşy ýaly, höwesjeňler hem bäsleşip biler. Bäsleşige gatnaşmak – mugt.
Baş baýragyň eýesi Keniýadaky Masai Mara safarisine gezelenç we Tanzaniýanyň Dar-es-Salam şäherindäki The Wonder Workshop-dan elde döredilen özboluşly kubogy alar. Beýleki baýraklaryň arasynda kiçi kategoriýadaky ýeňiji üçin Nikon Z30 fotokamerasy, Nikon Z8 toplumy, şeýle-de “Ýaş fotograf” kategoriýasynda ýeňiji üçin Affinity Photo programma üpjünçiligi bolan täze iPad bar. Şeýle-de, ähli kategoriýalaryň ýeňijileri Think Thank fotoapparat torbasyny alarlar.
