Kaliforniýada dünýäde iň betnyşan it ady ugrundaky bäsleşigiň ýeňijisi saýlandy.
2024-nji ýylda bäsleşigiň ýeňijisi Waýld Teng atly pekines boldy. Oregon amerikan şäherinden bolan bu it bäsleşige mundan öň dört gezek gatnaşdy. Ahyrynda, oňa bäşinji synanyşykda ýeňiji bolmak başartdy.
Pekinesiň adaty bolmadyk görnüşi 10 hepde ýaşynda başdan geçiren “mergi” (Karre keseli) – haýwanlaryň agyr ýokanç keseli bilen baglanyşyklydyr. Keselden soň itiň dişleri ösmegini bes etdi. Şonuň üçin onuň agzyndan dili hemişe daşyna sallanýar. Kesel myşsalaryň işine-de täsirini ýetirdi, şol sebäpli itjagaz geň ýöreýär.
Ýeňşi üçin Waýld Teng we onuň eýesi Enn Lýuis 5 müň dollar möçberinde baýrak alarlar we NBC teleşouwyna gatnaşarlar.
Bäsleşikde ikinji orny we 3 müň dollary 14 ýaşly mops Roum aldy. It tekerli proteziň kömegi bilen hereket edýär. Ol bäsleşige ilkinji gezek gatnaşdy.
Üçünji orny 14 ýaşly Deýzi Meý eýeledi. Ol häzirki eýeleri halas edýänçä iki ýaşyna çenli öýsüz gezdi. It gözüni we ähli dişlerini ýitirdi, ýöne häzir ol alada bilen gurşalýar.
“Dünýäde iň betnyşan it” bäsleşigi ýarym asyr bäri geçirilýär. Çäräniň düýp manysy haýwanlaryň kemçilikleriniň olary aýratyn we beýlekilerden tapawutly edýändigini görkezmekden ybarat.
