Germaniýanyň milli ýygyndysy Şweýsariýa bilen 1:1 hasapda oýnap, Ýewro-2024-üň A toparynda birinji orundan pleý-off tapgyryna çykdy. Duşuşyk Maýn boýundaky Frankfurtda geçirildi.
28-nji minutda şweýsariýalylar Dan Ndoýyň geçiren goly bilen öňe çykdylar. Germaniýa hasaby ikinji ýaryma goşulan soňky minutlarda deňlemegi başardy. 90+2-nji minutda Niklas Fýullkrug gol geçirdi.
Bu duşuşyk Manuel Noýer üçin rekord duşuşyk boldy. 38 ýaşly derwezeban Ýewropa çempionatlarynda 18-nji duşuşygyny geçirip, bu görkeziji babatda Janluiji Buffondan geçdi.
Bu toparda ugurdaş duşuşykda Ştutgartda Wengriýanyň milli ýygyndysy 100-nji minutda gol geçirip, 1:0 hasap bilen Şotlandiýadan üstün çykdy. Kewin Çobot (90+10) gol geçirdi.
Bu gol Ýewropa çempionatlarynyň taryhynda goşmaça oýnalan ýarymlary hasaba almazdan (99:32) geçirilen iň giçki gol boldy.
Ikinji ýarymda şotlandiýalylar derwezebany bilen çaknyşykdan soň Wengriýanyň hüjümçisi Barnabaş Warga agyr şikes alyp, özünden gitdi. Oýun birnäçe wagtlyk togtadyldy, oýunçyny meýdançadan kislorod maskaly göterip çykardylar.
Şeýlelikde, Germaniýa (7) we Şweýsariýa (5) Ýewronyň pleý-off tapgyryna degişlilikde birinji we ikinji ýerden çykdylar. Wengriýalylar 3 utuk toplap, pleý-off-a çykmak üçin teoretiki mümkinçilik aldylar. Şotlandiýa 1 utuk bilen öýüne gaýtdy.
Germaniýa 29-njy iýunda Dortmundda 1/8 finalda C toparyň ikinji ýer alan ýygyndysy bilen duşuşar (Angliýa, Daniýa, Sloweniýa ýa-da Serbiýa). Şweýsariýa 29-njy iýunda Berlinde B toparyň ikinji ýer alan ýygyndysy bilen duşuşar (Italiýa, Albaniýa ýa-da Horwatiýa).
