“Barselona” Hindistandaky ähli futbol akademiýalaryny maksatnama işe girizilenden 14 ýyl soň ýapdy. Bu barada klubuň saýtynda habar berilýär.
2024-nji ýylyň 1-nji iýulyndan “Barselonanyň” futbol mekdepleri Delide, Mumbaýda, Bangalorda we Punede işini bes eder. Klub akademiýalaryň okuwçylaryna we olaryň maşgalalaryna eýýäm degişli habary iberdi.
Iň meşhur futbol klublarynyň biri bolan “Barselonanyň” ýaşlar taslamasy Hindistanda 2010-njy ýylda işe girizildi, şondan soň müňlerçe ýaşlar “Barsanyň” stilinde we toparyň gymmatlyklaryny göz öňünde tutup, futbol oýnamagy öwrenip başlady.
“Barsa” ýaş futbolçylaryň maşgalalaryna köp ýyllaryň dowamynda taslama bolan ynamlary üçin, şeýle-de ähli tälimçilere, hyzmat ediji işgärlere we Hindistanda toparyň akademiýa boýunça hyzmatdaşy Conscient Sports kompaniýasyna minnetdarlyk bildirýär” – diýlip, klubuň habarynda aýdylýar.
Klub 1,4 milliarddan gowrak adamyň ýaşaýan ýurdunda ýaş zehinli futbolçylary gözlemek maksatnamasyny ýatyrmagynyň sebäbini görkezmeýär.
“Barselonanyň” çagalar-ýetginjekler futbol merkezleri dört ýaşdan 17 ýaş aralygyndaky oglanlar we gyzlar üçin niýetlenendir. Türgenleşik prosesi Kataloniýa klubunyň usulyýetine we filosofiýasyna laýyklykda gurnalýar. Dürli döwürlerde “Barselonanyň” ýetginjekler sistemasyndan köp sanly meşhur futbolçylar, şol sanda argentinaly hüjümçi Lionel Messi-de geçdi. Ol akademiýa 13 ýaşynda girdi.
