Meşhur pop-rok topary Coldplay 4-nji oktýabrda indiki “Moon Music” albomynyň çykaryljakdygyny anons etdi. Albom gaýtadan işlenen plastik çüýşelerden ýasalan plastinkada çykar diýip, “The Guardian” gazeti habar berdi.
Her 140 gram plastinkany çykarmak üçin hojalyk galyndylaryndan ýygnalan 9 plastik çüýşesi gerek bolýar. Ýörite wersiýa üçin Gonduras aýlagyna we Atlantik ummanyna düşmeginiň öňüni almak üçin Gwatemalada The Ocean Cleanup guramasy tarapyndan tutulyp alnan plastik ulanylar.
Topar şeýle çemeleşmäniň kömürturşy gazynyň zyňyndylaryny adaty winil plastinkalaryň önümçiligi bilen deňeşdirilende 85% azaltmaga we 25 tonna başlangyç plastmassa önümçiliginiň öňüni almaga mümkinçilik berjekdigini aýdýar. Ykjam diskler hem 90% gaýtadan işlenen plastikden taýýarlanyp, zyňyndylary adaty önümçilik bilen deňeşdirilende 78% azaldar.
Şeýle-de, Coldplay gastrollaryň daşky gurşawa ýetirýän täsirini azaltmaga çalyşýar. Topar ähli döwürleriň üçünji iň girdejili syýahaty diýlip ykrar edilen “Music of the Spheres” konsert syýahatyny dowam etdirýär.
Öň, Coldplay kömürturşy gazynyň zyňyndylarynyň öňki syýahat bilen deňeşdirilende 59% azalandygyny aýtdylar. Sazandalar awiauçuşlaryň sanyny azaltdylar we “döredijilikli tehnologiýa çözgütlerini”, mysal üçin, märekäniň hereketinden alynýan energiýanyň hasabyna işleýän “kinetiki tans meýdançalaryny” hödürlediler.
“Moon Music” toparyň 10-njy albomy bolar. Ýazgy üçin topar mundan öňki “Music of the Spheres” albomynyň prodýuseri Maks Martini çekdi. Ol Backstreet Boys, NSYNC, Britni Spirs, Maroon 5, Teýlor Swift we The Weeknd ýaly ýyldyzlaryň ençeme hitleriniň awtorydyr.
Täze albomdan ilkinji aýdym “feelslikeimfallinginlove” 21-nji iýunda çykar.
