Amerikan çip öndürijisi Nvidia dünýäniň iň gymmat kompaniýasy boldy. Bu barada Bloomberg habar berýär.
Şu hepde Nvidia-nyň ösüşi iň ýokary derejesine ýetdi: 3,34 trln dollar bazar bahaly kompaniýa bahasy 3,32 trln dollar bolan Microsoft-dan öňe geçdi.
Ýylyň başyndan bäri Nvidia-nyň paýnamalary 181% ýokarlandy, ýagny kompaniýanyň bahasyna şu ýylyň dowamynda 2 trln dollardan gowrak mukdar goşuldy.
Häzirki tendensiýalaryň esasynda Barron’s analitikleri Nvidia-nyň 4 trln dollar görkezijisinden ilkinji bolup geçmek üçin ähli mümkinçiliginiň bardygyny belleýärler. Kapitalizasiýasyny 2 trln dollardan 3 trln dollara çenli artdyrmak üçin kompaniýa üç aý gerek boldy. Deňeşdirsek, munuň üçin Apple 719 söwda gününi, Microsoft 650 gün sarp etdi.
Navellier & Associaties maýa goýum kompaniýasy Nvidia-nyň bazar bahasynyň eýýäm şu ýyl 4 trln dollara ýetmegine, indiki ýyl bolsa 5 trln dollardan geçmegine garaşýar.
Nvidia emeli aň tehnologiýasynyň iň uly peýdalanyjysy hasaplanýar, ol maglumat merkezlerine emeli aň programmalary üçin zerur bolan çylşyrymly hasaplaýyş ýumuşlaryny ýerine ýetirmäge kömek edýän mikroshemalary bilen bazarda agalyk edijidir.
