Germaniýada dowam edýän futbol boýunça Ýewropa çempionatynda Ukrainanyň milli ýygyndysy garaşylmadyk ýagdaýda Rumyniýadan 3:0 hasabynda utuldy.
Geçen Ýewro-da çärýek final tapgyra barmagy başaran ukrainalylar ähli görkezijiler babatda garşydaşyndan asgyn geldiler. Rumyniýa 29-njy minutda Nikolae Stançunyň uzakdan goly bilen hasaby açdy, ikinji ýarymda Razwan Marin (53) we Denis Draguş (57) hasaby artdyrdy.
E toparyň beýleki oýnunda Slowakiýa 1:0 hasap bilen Belgiýadan üstün çykdy. Ýeke-täk goly 7-nji minutda Iwan Şrans geçirdi.
Belgiýalylar duşuşygyň barşynda iki gezek - 56-njy we 86-njy minutlarda Romelu Lukakunyň goluny baýram etdiler. Emma olaryň ikisi hem wideogaýtalamadan soň ýatyryldy. Birinjide oýundan daşardaky ýagdaý hasaba alyndy, ikini gezekde bolsa hüjümde oýunçynyň el bilen oýnandygy ýüze çykaryldy.
Indiki tapgyrda slowakiýalylar 21-nji iýunda ukrainalylar bilen, belgiýalylar bolsa 22-nji iýunda rumynlar bilen duşuşar.
D toparda Fransiýanyň milli ýygyndysy Maksimiliana Weberiň öz derwezesine geçiren goly bilen (38) Awstriýany ýeňdiler. Weber Mbappeniň urgusyndan soň topy ýalňyşlyk bilen öz derwezesine gönükdirdi. Öňküsi gün bu topardan Niderlandlar 2:1 hasap bilen Polşany utdular.
Fransuzlar indiki duşuşygyny niderlandlara, Awstriýa bolsa Polşa garşy geçirer.
