Waterloo uniwersitetiniň täze energiýa barlaglary laboratoriýasynyň alymlary ýerli çeşmelerden peýdalanyp, Aýda ýangyç öndürmegiň usulyny tapdylar.
Barlagçylar Aýyň topragynyň üstki gatlagy bolan regolitiň özünde ýokary derejede kislorod saklaýan metal tozanyna baýdygyny anykladylar. Bu bolsa ony goşmaça atmosfera kislorodyny talap etmeýän termit reaksiýasynda ulanmaga mümkinçilik berýär.
Laboratoriýa şertlerinde alymlar Aýdaky şertleri simulýasiýa edip, regolitiň köne hemralardan alnan alýumin bilen bilelikde ýangyç öndürmek üçin ulanylyp bilinjekdigini anykladylar.
Bu usul ýangyç döretmekden başga-da, kosmos galyndylary bilen bagly meseläni çözmäge kömek eder.
Laboratoriýanyň müdiri Jon Ben Aýyň topragyny ýangyç öndürmek üçin ulanmak Aýyň özleşdirilmeginde möhüm ädim boljakdygyny aýtdy.
Alymlar Aýyň topragyndan peýdaly materiallary almak prosesini optimizirlemek üçin gözlegleri dowam etdirýärler.
"Bu barlaglar ylmy fantastikany hakykata öwürýär" - diýip, barlagyň esasy awtory Konnor MakRobbi bu tehnologiýanyň adamzada diňe bir Aýy däl, eýsem geljekde beýleki kosmos obýektlerini hem öwrenmäge kömek etjekdigini aýtdy.
