Kompaniýada aýtmaklaryna görä, Toyota awtoulag pudagynda köp zady üýtgetjek içinden ýandyrylýan hereketlendirijileri (ICE) hödürlemäge taýynlanýar diýip, Motor1 habar berýär.
Gibrid ulaglar üçin işlenip düzülen 1,5 we 2,0 litrlik dört silindrli hereketlendirijilerde has gysga porşen aralygy we ykjam ölçegleri bilen tapawutlanýar. Toyota-nyň tehniki direktory Hiroki Nakadzima, bar bolan içinden otlanýan hereketlendirijiler bilen deňeşdirilende, olary “düýbünden başga” diýip atlandyrdy we ýokary netijelidigini, howa akymynyň optimallaşdyrylandygyny nygtady.
Şeýle hereketlendirijili ilkinji awtoulaglar 2027-nji ýyldan soň bazara çykar. Toyota bioýangyç, wodorod we sintetiki ýangyç ýaly, dürli ýangyçlarda işläp bilýän güýç gurluşlaryny işjeň ösdürýär. Kompaniýa entek olaryň tehnologiýasy barada jikme-jiklikleri açmady, ýöne täze hereketlendirijileriň birnäçe innowasiýa aýratynlyklaryna eýe boljakdygyny wada berdi.
Kompaniýa öň Mazda we Subaru bilen hyzmatdaşlykda täze önümiň üstünde işlemek baradaky meýilnamasyny yglan edipdi.
