Meşhur Firefox brauzerini işläp düzüji – Mozilla kompaniýasy neýroulgamlaryň kömegi bilen saýtlary awtomatiki usulda döretmek üçin Solo hyzmatyny hödürledi. Hyzmat mugt bolup, hiç hili programmirleme başarnyklaryny talap etmezden sanlyja minutda saýt döretmäge mümkinçilik berýär diýip, Hi-Tech Mail.ru habar berýär.
Solo adaty interfeýs elementlerini awtomatiki döretmek üçin maşyn biliminiň mehanizmlerini ulanýar. Mysal üçin, neýroulgam stile laýyk daşlyk, seslenmeler bilen blok, aragatnaşyk maglumatlaryny, Cookie-faýllarynyň ulanylýandygy baradaky duýduryş bannerlerini we saýtlaryň köpüsinde duş gelýän beýleki adaty elementleri döredip biler.
Tutuş proses 8 ýönekeý ädimi öz içine alýar:
- PK-dan ýa-da noutbukdan Solo saýtyna geçiň;
- Iňlis dilindäki ikinji penjirede saýtyňyzyň beýanyny görkeziň: tema, format, stil we ş.m.;
- Saýtyň adyny giriziň, mysal üçin, bu siziň brendiňiziň ady bolup biler;
- Next basyň;
- Geljekki saýtda ulanyljak esasy şrifti saýlaň;
- Reňk palitrasyny saýlaň;
- Saýtyňyzda gerek bolan bloklary saýlaň;
- Create your site basyň we netijesine garaşyň.
Şeýle-de, neýroulgamyň maksatly auditoriýany göz öňünde tutup saýt döretmegi üçin, isleseňiz, geografiki ýerleşişi hem görkezip bolar.
Solo diňe saýtyň esasy galybyny döredip berýär, soň ony elde sazlamak bolar. Ulanyjy reňkleri, nyşanlaryň ýerleşişini, salgylanmalary we ş.m. üýtgedip biler. Ähli suratlar awtomatiki usulda Unsplash katalogyndan saýlanýar, ýöne ulanyjylar öz suratlaryny hem ýükläp bilerler.
Mozilla tölegli domenleri satmak arkaly Solo-dan pul gazanmagy meýilleşdirýär, ýöne ulanyjylar döredilen saýty öz hususy hostingine hem geçirip bilerler.
Geljekde kompaniýa Solo funksionalyny giňeltmegi, täze temalary we stilleri, şeýle-de saýty redaktirlemek üçin gurallary goşmagy meýilleşdirýär. Mundan başga-da, surat katalogyny ulanmagyň deregine şekilleri döredýän neýroulgamy girizmegi meýilleşdirýär.
