Portugaliýanyň milli ýygyndysynyň öňki tälimçisi Fernandu Santuş Azerbaýjanyň milli ýygyndysynyň täze halypasy boldy. Baş tälimçiniň bellenendigi barada Azerbaýjanyň Futbol Federasiýalarynyň Assosiasiýasynyň saýtynda habar berilýär.
69 ýaşly portugaliýaly soňky bir ýarym ýylda dört kluby çalyşdy. Ol 2022-nji ýylyň ýanwar aýynda Portugaliýanyň milli ýygyndysyny Katardaky dünýä çempionatynyň 1/4 finalynda Marokkodan utulandan soň terk etdi.
Şondan soň Santuş Polşanyň milli ýygyndysyna ýolbaşçy boldy, ýöne onuň bilen Ýewro saýlama tapgyrynda bäş oýnuň ikisinde ýeňiş gazandy we işden çykaryldy. Halypanyň soňky iş ýeri Türkiýäniň “Beşiktaşy” boldy, onda bary-ýogy üç aý işledi.
Azerbaýjanyň milli ýygyndysy FIFA-nyň reýtinginde 112-nji orny eýeleýär. Santuşyň öňünde topary Ýewro-2028-e çykarmak wezipesi goýuldy.
Ýatlap geçsek, Santuş Portugaliýanyň milli ýygyndysy bilen Ýewro-2016-da we 2018/2019-möwsüminiň Milletler ligasynda ýeňiş gazandy. Ol Katardaky dünýä çempionatynda soňky iki oýunda başlangyç düzüme kapitan Kriştianu Ronalduny goşmazlyk kararyna geldi, bu hem birnäçe nägilelikleri döretdi.
