Halkara awtomobil federasiýasy (FIA) saýtynda “Formula-1-iň” 2026-njy ýyl möwsüminden güýje girjek täze düzgünnamasyny hödürledi. Bu barada RIA Nowosti habar berýär.
Düzgünlere laýyklykda, bolidler häzirkilerden 30 kg ýeňil, 200 mm gysga we 100 mm inçe bolar, bu hem olaryň netijeliligini we dolandyryjylygyny ýokarlandyrar. Döwrebaplaşdyrylan gibrid güýç gurluşynyň batareýalary öňki nesil hereketlendirijileri bilen deňeşdirilende üç esse kuwwatly bolar.
DRS sistemasynyň deregine hereket edýän öňki we yzky ganatlary öz içine alýan işjeň aerodinamika peýda bolar. Bu adaty Z-Mode režimi ulanylanda öwrümlerde has ýokary tizligi üpjün eder. Göni ýollarda ýaryşa gatnaşyjylar tizligi ýokarlandyrmak üçin ýörite işlenip düzülen pes garşylykly X-Mode režimine geçip bilerler. Basyş güýjüniň derejesi 30%, öňden gelýän garşylyk 55% peseler.
El bilen dolandyryş režimi ozup geçmek üçin has köp elektrik energiýasyny ulanmaga mümkinçilik berer. Ozuş režiminde kuwwatlylyk 120 kWt-den 350 kWt-e çenli ýokarlanar.
2026-njy ýylda awtomobiller 100 göterim ekologiýa taýdan arassa ýangyçda işlär. Bolidleriň howpsuzlygy has berk gurluşlar we has güýçli kraş-synaglar arkaly ýokarlandyrylar.
2026-njy ýylyň düzgünnamasy 28-nji iýunda Bütindünýä awtosport geňeşi tarapyndan resmi taýdan tassyklanmaly.
