Ilon Maskyň xAI startapy emeli aň bazarynyň OpenAI, Google we Microsoft ýaly liderleri bilen bäsleşmek üçin dünýäde iň güýçli superkompýuterleriň birini döredýär. Bu barada “The Information-a” salgylanyp, Reuters agentligi habar berýär.
2025-nji ýylyň güýzüne çenli taýýar bolmagyna garaşylýan superkompýuter 100 000 Nvidia H100 grafiki prosessoryny ulanar. Bu bar bolan analoglaryňkydan dört esse köp bolup, xAI startapyna has çylşyrymly modelleri işläp düzmäge we okatmaga mümkinçilik berer.
Mask 2024-nji ýylyň ahyryna çenli xAI-iň pudak liderleri bilen bäsleşip biljekdigine, 2025-nji ýylyň ahyryna çenli bolsa emeli aň ulgamlarynyň dürli işlerde adamzat mümkinçiliklerinden üstün geljekdigine ynanýar.
Şeýle ulgamlaryň biri häzirki wagtda işläp taýýarlamagyň irki tapgyrynda bolan Grok çat-boty bolar. Grok tebigy aragatnaşyga, döredijilik mazmunyny döretmäge we giň meseleler toplumyny çözmäge ukyply kuwwatly dil modeli bolar.
xAI “hasaplaýyş gigafabrikasyny” döretmek üçin Oracle bilen hyzmatdaşlyk edip biler.
