Ýurduň premýer-ministri Rişi Sunak 4-nji iýulda Beýik Britaniýada möhletinden öň ählumumy (parlament) saýlawlarynyň geçiriljekdigini aýtdy diýip, “Bi-Bi-Si” habar berýär.
“Onuň Alyhezretinden [Karl III] parlamenti dargatmaga rugsat bermegini haýyş etdim. Patyşa bu haýyşy kabul etdi we 4-nji iýulda ählumumy saýlawlar bolar" - diýip, Sunak özüniň Londonda Dauning-stritdäki rezidensiýasynyň agzynda eden çykyşynda aýtdy.
Sunak öz çykyşynda “öz hökümetiniň gazananlaryna" buýsanýandygyny aýtdy.
"Ykdysady durnuklylyk islendik üstünligiň esasyny düzýär" - diýip, häzirki hökümet başlygy Beýik Britaniýanyň ykdysadyýetiniň henizem ösýändigini we hümmetsizlenmäniň kadaly ýagdaýa gelendigini aýtdy.
Kanuna görä, saýlawlar 2025-nji ýylyň ýanwaryndan gijä galman geçirilmelidi. Seljerijiler olaryň güýzde bolmagyna garaşýardylar, ýöne hökümet ony has öňe süýşürmek barada ylalaşdy.
