Oňurgasyna şikes ýeteni sebäpli ysmazlykdan ejir çekýän 30 ýaşly Noland Arbo Neuralink implantyny alan ilkinji adam boldy. Ol žurnalistler bilen bolan söhbetdeşlikde bu innowasiýa tehnologiýasynyň durmuşyny näderejede üýtgedendigini düşündirdi.
"Ertiriň haýyrly, Amerika-da" geçirilen söhbetdeşligiň wideosyny kompaniýanyň esaslandyryjysy Ilon Mask X sosial ulgamyndaky blogynda çap etdi.
Arbo: "Meniň üçin irden turmagyň manysy ýokdy we bu (çipiň oturdylmagy) ýagdaýy düýpgöter üýtgetdi" – diýip boýun alýar.
Ýanwar aýynda oturdylan implant pikiriň güýji bilen kompýuteri doly diýen ýaly dolandyrmaga mümkinçilik berýär. Ondan öň muny etmek üçin dişleriniň arasyna gysylan stilusy ulanmaly bolýardy.
Operasiýadan soňky ilkinji hepde üstünlige beslendi. Arbo ertesi gün keselhanadan boşadyldy we täze endikleri özleşdirip başlady. Ol syçanyň kursoryny dolandyrmagy we “Küşt”, “Mario Kart” we “Civilization VI” oýnamagy öwrendi.
Şeýle-de bolsa, birnäçe hepdeden soň, implantyň käbir elektrodlary hatardan çykyp başlady we onuň netijeliligini peseltdi. Neuralink-iň inženerleri enjamy aýyrmagyň mümkinçiliklerine seredip ugradylar.
“Men howsala düşdüm. Başaryp bilýän ajaýyp zatlarymdan ýüz öwürmek gaty kyn boljakdy "-diýip, Arbo gürrüň berýär.
Netijede, kompaniýanyň hünärmenleri az sanly elektrod bilen öndürijiligi ýokarlandyryp, implantyň işini gowulandyrmagy başardylar.
Kynçylyklara garamazdan, Neuralink tehnologiýasynyň üstünde işlemegini dowam etdirýär. Kompaniýa kwadriplegiýa ýa-da amiotrofik gapdal sklerozly adamlaryň gatnaşyp biljek kliniki synagy üçin ikinji hassany gözleýär.
