24-nji maýda Türkmenistanyň Türkiýedäki Baş konsuly M.Öwezow Türki Dünýäsiniň işewürleri Assosiasiýasynyň (TÜRKGİAD) ýolbaşçylary bilen duşuşdy. Bu barada TmCars-a Türkmenistanyň Stambuldaky diplomatik wekilhanasynda habar berdiler.
Duşuşygyň dowamynda söhbetdeşler soňky ýyllarda türkmen-türk gatnaşyklaryny hil taýdan täze derejä çykarmak üçin baý we oňyn hyzmatdaşlyk tejribesiniň toplanandygyny nygtadylar.
Şeýle hem taraplar ýangyç-energetika, ulag-aragatnaşyk, oba hojalygy, azyk we dokma senagaty pudaklary, ekologiýa ýaly möhüm ugurlarda täze mümkinçilikleriň açylýandygyny bellediler.
Mundan başga-da, häzirki wagtda ylym-bilim we ýokary tehnologiýalar babatynda ikitaraplaýyn hyzmatdaşlygyň üstünlikli amala aşyrylýandygy we olaryň özara bähbitli gatnaşyklara şaýatlyk edýändigi bellenildi. Şu nukdaýnazardan, Türki Dünýäsiniň işewürleri Assosiasiýasynyň (TÜRKGİAD) wekilleri Türkiýäniň ýokary okuw jaýlarynda bilim almak isleýän türkmen ýaşlary üçin hem ähli şertleriň bardygyny bellediler.
