Hytaýyň Unitree kompaniýasy öý we ofis üçin elýeterli hem-de uniwersal kömekçi bolup durýan täze G1 robot-gumanoidini hödürledi diýip, New Atlas neşiri ýazýar.
Robotyň 43 dereje erkinligi bar (ýagny, bogunlary 43 dürli aýlanyp bilýär), bu onuň täsin çeýedigini görkezmek bilen, dürli wezipeleri ýerine ýetirmäge mümkinçilik berýär. Kellesinde ekrany, birnäçe 3D LiDAR datçigi we çuňluk kamerasy bar.
Neşir edilen wideoda Unitree G1 içi gazlandyrylan suwly aýna çüýşäni açýar (beýlebir seresap bolmasa-da), hoz döwýär, tabakdaky tosty howada zyňyp, beýlesine öwürýär. Robot transportirowka üçin özbaşdak eplenip ýygnalýar.
G1 sekiz ýadroly prosessor, Wi-Fi 6 we Bluetooth 5,2 modullary we 2 sagada çenli özbaşdak işlemegi üpjün edýän 9000 mAh batareýa bilen enjamlaşdyrylandyr. Agramy 35 kg bolan robot güýçli zarbalara çydap bilýär - wideoýazgyda kompaniýanyň boks ellikli işgäri robotyň döşüne birnäçe gezek urýar.
Unitree G1-iň bahasy 16 000 dollar, bu ony bazardaky beýleki gumanoid robotlara garanyňda has elýeterli edýär.
Deňeşdirmek üçin, bäş aý mundan ozal hödürlenen ilkinji Unitree H1 gumanoid-robotyň bahasy 90 müň dollar.
