Italiýanyň “Ýuwentus” futbol kluby baş tälimçi Massimiliano Allegrini işden çykardy. Bu barada turinlileriň resmi saýtyna salgylanyp, RIA Nowosti habar berýär.
Çarşenbe güni “Ýuwentus” Italiýanyň Kubogynyň finalynda “Atalantany” 1:0 hasabynda utup, 15 gezek kubok eýesi boldy. Hünärmen oýnuň ikinji ýarymyna goşulan bäşinji minutda oýundan çetleşdirildi. Oýundan soň Allegri özüni gaharly alyp baryp, klubuň ýolbaşçylary bilen batly äheňde gürleşdi, soňra “Tuttosportyň” žurnalistini kemsitdi.
“Onuň işden çykarylmagy Italiýanyň Kubogynyň finaly wagtynda we ondan soň özüni alyp barşy bilen baglanyşyklydyr, klub onuň bu hereketini “Ýuwentusyň” gymmatlyklaryna laýyk gelmeýär diýip hasaplady” – diýlip, klubuň beýanynda aýdylýar.
Häzirki möwsümde “Ýuwentusyň” milli çempionatda iki oýny galdy – “Bolonýa” (20-nji maý) we “Monsa” garşy (26-njy maý). Klub ýaryş jedwelinde dördünji orny eýeleýär, onuň hasabynda 67 utuk bar.
Allegri 56 ýaşynda, ol “Ýuwentusda” 2021-nji ýyldan bäri işleýärdi, mundan öň 2014-nji ýyldan 2019-njy ýyl aralygynda topara ýolbaşçylyk etdi. Onuň ýolbaşçylygynda klub bäş gezek Italiýanyň çempionatynda we Kubogynda ýeňiji boldy, iki gezek ýurduň Super kubogyny gazandy we ýene iki gezek Çempionlar ligasynyň finalyna çykdy. 2010-njy ýyldan 2014-nji ýyl aralygynda Allegri “Milana” ýolbaşçylyk edip, topary Italiýanyň çempionatynda we Super kubogynda ýeňşe getirdi.
