Dokuzynjy Hazar mediaforumy 16-njy awgustda Astrahanda geçirilip, mediahünärmenler we medeniýet söýüjileri üçin özüne çekiji merkeze öwrüler. Bu barada “Russiýa – Yslam dünýäsi: KazanForum” forumynda Astrahan sebitiniň medeniýet ministri Olga Prokofýewa aýtdy diýip, TASS habar berýär.
Forumyň mowzugy “Medeniýetleriň dialogy Hazar sebitiniň ösüşiniň binýady hökmünde” bolar. Forum diňe bir media pudagyndaky häzirki meseleleri ara alyp maslahatlaşmak üçin platforma bolman, eýsem myhmanlara gyzykly “Hazar möwsümleri” medeni festiwalyny sowgat eder. Festiwalyň çäklerinde Astrahan kremliniň taryhy sahnasynda açyk asmanyň astynda opera görkeziler, oňa dünýä sahnasynyň ýyldyzlary gatnaşar.
Şeýle-de, Hazarýaka döwletleriniň simfoniki orkestriniň (düzüminde Russiýadan, Azerbaýjandan, Eýrandan, Gazagystandan we Türkmenistandan sazandalar bar) ýerine ýetirmeginde saz ýaňlanar, ýaşlar simfoniki orkestri bolsa täze programmany hödürlär.
Mundan başga-da, Hazarýaka ýurtlaryndan okamaga we kitaplara bolan gyzyklanmany artdyrmak maksady bilen Dostlukly edebiýat merkezi açylar.
