Google I/O konferensiýasynda Google DeepMind tarapyndan işlenip düzülen innowasion emeli aň kömekçisi Project Astra hödürlendi. Ol ulanyjy bilen hakyky wagtda aragatnaşyk saklamak üçin smartfon kamerasyny ulanýar we giň mümkinçilikler toplumyny hödürleýär. Işläp düzüjiler ol geljekde adamlaryň gündelik durmuşynda zerur kömekçä öwrüler diýip hasaplaýarlar.
Güýçli multimodal Google Gemini modeline esaslanýan Project Astra diňe bir wizual maglumatlary seljermek bilen çäklenmän, eýsem ulanyjy bilen söhbetdeş bolmagy başarýar. Konferensiýada programma birnäçe haýran galdyryjy funksiýalary görkezdi:
- Obýektleri tanamak: Astra smartfon kamerasy bilen görlen aýdym-saz kolonkasyny tanamagy we hatda onuň ulanyjy tarapyndan görkezilen aýratyn detalynyň adyny aýtmagy başardy.
- Kontekste düşünmek: Astra penjireden panorama arkaly şäheri tanady we onuň gözel ýerleri barada gürrüň berdi.
Google DeepMind-yň baş müdiri Demis Hassabisiň aýtmagyna görä, Project Astra gündelik durmuşda aýrylmaz kömekçi bolar. Ol geljekde diňe bir smartfonlarda däl, eýsem “akylly” äýneklerde-de elýeterli bolar.
Project Astra-nyň resmi reliziniň senesi heniz yglan edilmedi.
