Russiýa Federasiýasynyň Prezidenti Wladimir Putin hökümet agzalaryny we gulluk müdirlerini bellemek baradaky permanlara gol çekdi. Bu barada Kremliň saýtynda habar berilýär.
Hususan-da, Russiýanyň lideri güýç blogunyň ministrlerini we DIM-iň başlygyny tassyklady. Goranmak ministri Andreý Belousow boldy. Edaranyň öňki başlygy Sergeý Şoýgu RF-iň Howpsuzlyk geňeşiniň sekretary wezipesine bellendi. Içeri işler ministrliginiň we Adatdan daşary ýagdaýlar ministrliginiň ýolbaşçylarynyň wezipelerini, degişlilikde, Wladimir Kolokolsew we Aleksandr Kurenkow saklady.
Sergeý Lawrow DIM-iň başlygy wezipesine gaýtadan bellendi, Konstantin Çuýçenko bolsa Adalat ministrliginiň ýolbaşçysy bolup galdy.
Ilkinji gezek ministr orunlaryny Anton Alihanow (senagat we söwda ministri), Mihail Degtýarew (sport ministri), Oksana Lut (oba hojalygy ministri), Roman Starowoýt (ulag ministri) we Sergeý Siwilew (energetika ministri) eýeledi.
Täze wise-premýerler öňki oba hojalygy ministri Dmitriý Patruşew, şeýle-de öňki ulag ministri Witaliý Sawelýew boldy.
Mundan başga-da, Wladimir Putin Prezident administrasiýasynyň ýolbaşçylygyna bellemek barada permanlara gol çekdi. Howpsuzlyk geňeşiniň öňki sekretary Nikolaý Patruşew we Tula welaýatynyň öňki gubernatory Alekseý Dýumin ilkinji gezek döwlet Baştutanynyň kömekçileri boldular.
RF-iň Prezidentiniň metbugat sekretary Dmitriý Peskow öz wezipesinde işini dowam etdirer.
