Anna güni geçirilen Hökümet mejlisiniň barşynda wise-premýer M.Mämmedowa “Magtymguly Pyragy” medeni-seýilgäh toplumynyň hem-de Magtymguly Pyragynyň ýadygärliginiň açylyş dabarasyna görülýän taýýarlyk işleri barada hasabat berdi.
Şunuň bilen baglylykda, meýilleşdirilen dabarany ýokary guramaçylyk derejesinde geçirmek maksady bilen, degişli işleriň ýerine ýetirilýändigi barada habar berildi. Çäräniň çäklerinde edebi-çeper kompozisiýalaryň görkezilişini hem-de teatr artistleriniň, medeniýet işgärleriniň we sungat ussatlarynyň dürli çykyşlaryny, şeýle hem ýadygärlige gül goýmak çäresini, yşyklaryň we dronlaryň üsti bilen şekilleriň görkezilişini hem-de baýramçylyk feýerwergini guramak göz öňünde tutulýar.
Dabara Magtymguly Pyragynyň doglan gününiň 300 ýyllygyna bagyşlanyp medeniýet ministrleri derejesinde geçirilýän halkara maslahatyna hem-de “Pähim-paýhas ummany Magtymguly Pyragy” atly halkara ylmy maslahatyna gatnaşýan daşary ýurtly myhmanlaryň, TÜRKSOÝ-a agza döwletleriň ÝUNESKO-nyň işleri barada Milli toparlarynyň wekilleriniň, şeýle hem ýurdumyzdaky diplomatik wekilhanalarynyň ýolbaşçylarynyň we işgärleriniň gatnaşmaklary göz öňünde tutulýar.
Prezident Serdar Berdimuhamedow 17-nji maýda türkmeniň beýik ogly Magtymguly Pyragynyň heýkeliniň we medeni-seýilgäh toplumynyň açylyş dabarasynyň geçiriljekdigini aýdyp, wise-premýere dabarany hem-de halkara çärelerini ýokary derejede guramak boýunça degişli işleri geçirmegi tabşyrdy.
