Hyundai awtoulaglarynyň käbir aýratynlyklaryny abuna tölegli etmegi göz öňünde tutýar. Hususan-da, gürrüň oturgyçlary gyzdyryjylar ýaly opsiýalar hakda barýar diýip, IXBT habar berýär.
Hyundai Connected Mobility bölüminiň başlygy Markus Welsiň sözlerine görä, bu “awtoulagy has şahsylaşdyrmaga” mümkinçilik döreder.
Wels kompaniýanyň diňe bir awtoulag satmak bilen çäklenmän, eýsem, häzirki zaman sarp edijileriniň isleglerini kanagatlandyrýan täze hyzmatlary hödürlemäge çalyşýandygyny aýtdy. Mundan öň şuňa meňzeş abuna modelini BMW eýýäm durmuşa ornaşdyrypdy we dessine ulanyjylaryň tankydy seslenmelerine duçar bolupdy.
Hyundai özüniň Bluelink ulgamy üçin abuna ýazylmagyň birnäçe derejesini hödürlemegi meýilleşdirýär. Ulgam häzirki wagtda eýelerine kabinanyň temperaturasyny öňünden sazlamak, gapyny gulplamak we hemra nawigasiýasy ýaly, ulagyň käbir aýratynlyklaryny uzakdan dolandyrmaga mümkinçilik berýär.
Hyundai indi awtoulagyň eýelerine ilkinji on ýylda kartalar we onlaýn-mümkinçilikler ýaly, esasy aýratynlyklary öz içine alýan mugt Lite paketini hödürlemekçi. Uzak aralykdan dolandyrylýan aýratynlyklara we maglumat esasly giňeldilen hyzmatlara girmek üçin tölegli Plus (aýda 2,99 ýewro) we Pro (9,99 ýewro) paketlere ýazylmaly bolar.
