Penşenbe güni, 9-njy maýda Şwesiýanyň Malmýo şäherinde “Ýewrowideniýe – 2024” aýdym-saz bäsleşiginiň ikinji ýarym finaly geçirildi. Şenbe güni, 11-nji maýda boljak grand-finala geçmek hukugy ugrunda 16 gatnaşyjy ýurduň wekilleri bäsleşdi we şolardan diňe 10-usy bu mümkinçiligi aldy.
Şeýlelikde, tomaşaçylaryň öz söýgüli aýdymçylaryna ses bermegi esasynda Latwiýa, Awstriýa, Niderlandlar, Norwegiýa, Ysraýyl, Gresiýa, Estoniýa, Şweýsariýa, Gruziýa, Ermenistan bäsleşigiň finalyna çykdy. Malta, Albaniýa, Belgiýa, San-Marino, Daniýa we Çehiýa bolsa bäsleşigi terk etmeli boldy.
Ýeri gelende bellesek, ýarym finallaryň netijeleri diňe tomaşaçylaryň ses bermegi esasynda kesgitlenýär, ýagny emin agzalarynyň bahalary hasaba alynmaýar. Şeýle tejribe geçen ýyl girizildi.
Bäsleşigiň finaly 11-nji maýda geçirilip, 26 ýurduň wekilleri ýeňiş ugrunda bäsleşerler.
