Fewral aýynda Meizu kompaniýasy doly derejede emeli aňa we emeli aňly gurluşlary işläp taýýarlamaga ünsi jemlemek üçin smartfon bazaryndan gidýändigini habar beripdi. Şondan soň tiz wagtdan kompaniýa Meizu 21 Pro smartfonuny çykardy.
Şu gün bolsa kompaniýa şu aý emeli aňa esaslanýan üç sany täze önümi hödürlemegi meýilleşdirýändigini mälim etdi. Gynansak-da, jikme-jik maglumat ýok.
Görnüşi ýaly, Meizu täze telefonuň üstünde işleýän bolmaly. Gurluş ýakynda Hytaýda M468Q belgisi bilen 3C şahadatnamasyndan geçdi. Ol 66 Wt kuwwatly çalt simli zarýad berşi goldaýar. Onuň Meizu 21 Note bolup biljekdigi barada gürrüňler bar.
Bu telefonuň Snapdragon 8 Gen 2 prosessory, 5500 mAs sygymly akkumulýator we metal orta çarçuwaly tekiz ekran bilen üpjün edilmegine garaşylýar. Şundan ugur alsaň, kompaniýanyň smartfon bazaryndan gitmek pikiri ýok.
